Buletini i Depozitave

Informacion parakontraktual

Çfarë tregojnë maturitetet në tabelë?

Maturitetet e paraqitura në buletin janë afatet e disponueshme të depozitës me afat. Për çdo maturitet shfaqet norma përkatëse e interesit, sipas monedhës dhe kushteve në fuqi.

A është norma e interesit fikse?

Po. Norma e interesit është fikse për të gjithë periudhën e depozitës. Kjo do të thotë që, pasi depozita çelet, norma nuk ndryshon deri në maturim dhe ju e dini që në fillim sa interes do të përfitoni sipas shumës, afatit dhe monedhës së zgjedhur.

Cila është shuma minimale për çeljen e depozitës?

Shuma minimale për çeljen e depozitës është:

• 50,000 Lekë
• 500 Euro

Kur mund ta merrni interesin?

Ju mund të zgjidhni vetë se kur dëshironi ta merrni interesin, në varësi të opsioneve të disponueshme për çdo afat. Interesi mund të paguhet:

• në fillim;
• çdo muaj;
• çdo vit;
• në fund të maturitetit.

Jo çdo opsion mund të jetë i disponueshëm për çdo maturitet. Opsionet konkrete shfaqen gjatë çeljes së depozitës.

A ndryshon norma nëse zgjidhni ta merrni interesin më herët apo më vonë?

Jo. Momenti kur zgjidhni të merrni interesin nuk e ndryshon normën e interesit. Norma mbetet ajo që aplikohet për monedhën, shumën dhe maturitetin e zgjedhur.

Si përllogaritet interesi?

Interesi përllogaritet sipas formulës:

Interesi = (Norma e Interesit / 365) × Shuma e Depozitës × Numri i Ditëve

• Norma e Interesit është norma vjetore;
• Shuma e Depozitës është shuma e vendosur në depozitë;
• Numri i Ditëve është periudha gjatë së cilës depozita qëndron aktive.

A aplikohet tatim mbi interesin e përfituar nga depozita?

Po. Mbi interesin e përfituar nga depozita aplikohet tatim në burim prej 15%.

Ju nuk keni nevojë ta llogarisni apo ta paguani këtë tatim veçmas. Banka e mban tatimin automatikisht në momentin e pagesës së interesit dhe krediton ose paguan vetëm shumën neto të interesit, sipas mënyrës së pagesës së interesit të zgjedhur për depozitën.

A mund ta mbyllni depozitën para afatit?

Po. Ju mund të kërkoni mbylljen e depozitës para afatit. Për këtë, duhet të njoftoni Bankën dhe të paraqisni kërkesën për mbyllje të parakohshme, sipas procedurave të Bankës.

Çfarë ndodh me interesin nëse depozita mbyllet para afatit?

Trajtimi varet nga maturiteti i depozitës:

• Për depozitën 12-mujore, edhe nëse depozita mbyllet para afatit, ju përfitoni interesin për periudhën gjatë së cilës depozita ka qenë aktive.
• Për maturitetet e tjera, në rast mbylljeje para afatit, humbni të gjithë interesin.

Për këtë arsye, përpara se të zgjidhni afatin, duhet të vlerësoni nëse mund t'ju nevojiten fondet përpara maturimit.

A mund të rinovohet automatikisht depozita?

Po. Ju mund të zgjidhni rinovimin automatik të depozitës në maturim. Nëse zgjidhni rinovim automatik, depozita rinovohet sipas kushteve që janë në fuqi në momentin e rinovimit.

Përpara rinovimit, Banka do t'ju njoftojë për kushtet e reja, përfshirë normën e interesit, maturitetin dhe çdo element tjetër të zbatueshëm.

A janë të siguruara depozitat?

Po. Depozitat sigurohen nga Agjencia e Sigurimit të Depozitave (ASD), sipas skemës ligjore të sigurimit të depozitave në Republikën e Shqipërisë.

Mbulimi maksimal është deri në 2,500,000 Lekë për çdo depozitues, në çdo bankë, pavarësisht numrit të depozitave apo monedhës së tyre.

Nëse keni disa depozita ose llogari në të njëjtën bankë, ato trajtohen së bashku për qëllime të sigurimit, deri në kufirin maksimal ligjor.